በአቶ ገላሳ ዲልቦ የሚመራው የሽግግር ኦነግ አመራሮች ከኦሮሚያ ክልል ርዕሰ መስተዳድር አቶ ለማ መገርሳ ጋር ተወያዩ

በአቶ ገላሳ ዲልቦ የሚመራው የሽግግር ኦነግ አመራሮች ከኦሮሚያ ክልል ርዕሰ መስተዳድር አቶ ለማ መገርሳ ጋር ተወያዩ

በአቶ ገላሳ ዲልቦ የሚመራው የኦነግ የአመራር ቡድን መንግስት ያደረገለትን ጥሪ ተከትሎ ባሳለፍነው ሳምንት ወደ ሀገር ቤት ከተመለሰ በኋላ ከኦሮሚያ ክልል ርዕሰ መስተዳድር አቶ ለማ መገርሳ ጋር ለመጀመሪያ ጊዜ ተገናኝቶ ተወያይቷል።

በርዕሰመስተዳድሩ ጽህፈት ቤት በተካሄደው የሁለቱ አካላት ውይይት የኦነግ አመራሮች የተደረገላቸውን ጥሪ ተቀብለው በሰላማዊ ትግል ለመካፈል ወደሃገር ቤት በመግባታቸው አድናቆት ተችሯቸዋል።

ርዕሰመስተዳድሩ አቶ ለማ መገርሳ በውይይቱ ወቅት የኦነግ ነባር አመራሮች ሲያደርጉት ለነበረው ትግል ምስጋና አቅርበዋል።

ሁላችንንም ከቤት ያስወጣን ለኦሮሞ ህዝብ ትግል ነው ያሉት አቶ ለማ መገርሳ ተለያይተን ብንቆይም ዛሬ አንድ ላይ ተቀምጠን መነጋገራችንና በጋራ ለመስራት መስማማታችን ለኦሮሞ ህዝብ ትግል ትልቅ ተስፋ የሚሰጥ ነው ብለዋል።

የኦሮሞ ህዝብ አሁን ያገኘውን ድል ወደ ቀጣይ ምእራፍ ለማሸጋገር መደጋገፍ እና አብሮ መስራት አስፈላጊ መሆኑንም ርእሰ መስተዳድሩ አስታውቀዋል።

አቶ ገላሳ ዲልቦ በበኩላቸው ድርጅታቸው የሚያደርገው ትግል እርስ በእርስ ለመጠላለፍ ሳይሆን ለመደጋገፍ ነው ብለዋል።

በቀጣይም እጅ ለእጅ በመያያዝ እና በመደጋገፍ የኦሮሞን ህዝብ ትግል ወደ ቀጣይ ምዕራፍ ለማሸጋገር እንሰራለን ማለታቸውን የዘገበው ኤፍቢሲ ነው።